[东方报]世冠盃：久疏戰陣難作惡 車仔半細嗒得洛[06-16]

陈小坡

今晚世冠盃D組賽事，冠軍熱門之一嘅車路士鬥美職球會FC洛杉磯。論牌面車仔高出對手一班波，不過佢哋自從歐協聯決賽後，已經半個月冇比賽，作戰心態同狀態唔慌高，對住踢開穩陣波嘅FC洛杉磯冇咁易入到波，預計上半場拉鋸局面居多，1.5球半場細博得過。（周二凌晨3時開賽）

車仔近年處於重建期，表現難免比較飄忽，雖然上季成功搶到歐聯入場券同歐協聯冠軍，但夏天又諗住大換血，世冠盃前就簽入利安戴納同達里奧艾素高等新兵，其中英格蘭年輕箭頭利安戴納預計會成為常規主力，但初踢大會點都要時間適應，暫時唔好有太高期望。

FC洛杉磯勁硬淨
事實上，車仔入波能力令人擔憂，尼高拉斯積遜同尼干古都擔唔起大旗，若然進攻核心高爾彭馬被重點看管，進攻陷入啞火，尤其對住刻意防守球隊更易「老鼠拉龜」。事實上佢哋近期踢法都係穩陣為先，近4仗上半場都「食白果」，對上6場賽事半場總入球全開1球或以下。

FC洛杉磯有「銀河唯一」基奧特倒戈，又有洛里斯把守大門，不過整體實力唔及對手，今場必定會先求穩陣再伺機突擊，加上佢哋近10場賽事4勝6和未輸過夠晒硬淨，有望憑更好嘅作戰狀態抗衡，尤其上半場趁對手未入局下，頂到唔輸不足為奇，半場細盤機會高唱入雲。